Tabloidët e Beogradit ‘Večernje novosti’, e pas tyre edhe portale të tjera, publikuan mbrëmë një tekst me titullin: “Kurti rrit presionin ndaj serbëve: Prishtina po përgatit provokime të reja…”. Nga titulli duket sikur bëhet fjalë për një fakt të verifikuar nga gazetari. Megjithatë, në realitet kemi të bëjmë vetëm me një opinion – dhe atë të një bashkëbiseduesi të vetëm.
Portali Večernje novosti mbrëmë publikoi tekst mbi situatën aktuale në Kosovë, para zgjedhjeve të katërta për këtë vit, sërish të parakohshme parlamentare, të caktuara për 28 dhjetor.
Teksti fokusohet te pritjet se do të përsëriten modelet nga fushatat e mëparshme, kur bëhet fjalë për presionet e pushtetit aktual në Prishtinë ndaj serbëve në Kosovë – gjë që e kanë komentuar për portalin, siç thuhet – “bashkëbiseduesit”.
“Serbët në Kosovë dhe Metohi do ta presin Vitin e Ri në atmosferë të presioneve të shtuara, provokimeve dhe dhunës nga Prishtina, sepse regjimi i Albin Kurtit disa herë ka treguar se në fushata parazgjedhore e shtrëngon në maksimum rrethimin ndaj bashkëkombësve tanë dhe përfaqësuesve të tyre politikë në Listën Serbe. Kështu komentojnë bashkëbiseduesit faktin që në krahinën jugore, pas dhjetë muajve dhe dy përpjekjeve të pasuksesshme për formimin e qeverisë, sërish do të shkohet në zgjedhje për parlamentin e Prishtinës më 28 dhjetor”, shkruan në pjesën e parë të tekstit.
Më tej portali shkruan, duke u thirrur po ashtu në bashkëbisedues, se kjo datë, në mes të festave të fundvitit, “i është përshtatur Kurtit që manipulimet e tij zgjedhore, përpjekjet për të dobësuar LS-në dhe parregullsitë në numërimin e votave të kalojnë sa më pak nën radar, sidomos të institucioneve të Brukselit që do të jenë në pushim”.
Teksti përmend edhe reagimin e Bashkimit Evropian pas shpalljes së zgjedhjeve të reja – BE-ja ka shprehur keqardhje që Kosova nuk e ka tejkaluar krizën e gjatë politike dhe ka kërkuar përqendrim në dialogun me Beogradin. Novosti shton se Brukseli kërkon mbajtjen e zgjedhjeve sipas standardeve të larta dhe me pjesëmarrje të barabartë.
Më tej portali kritikon që në deklaratën e BE-së “nuk ka kritikë” për faktin se Kurti është në pushtet pothuajse një vit pas zgjedhjeve të 9 shkurtit dhe se “mund të ndodhë i njëjti skenar” pas votimit të ri – që asnjë parti shqiptare të mos sigurojë shumicën për formimin e qeverisë.
Kujtojnë se Lista Serbe ka fituar nëntë nga 10 mandatet e garantuara për komunitetin serb, duke akuzuar Kurtin se “me inxhinieri të vrazhdë zgjedhore” e ka “shtyrë” Nenad Rashiqin në ulësen e deputetit.
Sipas Novosti, Kurti pastaj ka “instaluar” Rashiqin, “duke shkelur ligjet”, në postin e nënkryetarit të parlamentit të rezervuar për përfaqësuesit e serbëve, edhe pse ai ka marrë vetëm rreth 4.000 vota, krahasuar me 40.000 të Listës Serbe.
Pas kësaj, në tekst shfaqet bashkëbiseduesi – historiani dhe analisti Srđan Graovac.
Ai deklaron se nuk dyshon se “mund të priten provokime dhe sulme të reja”, sepse, sipas tij, Kurti gjatë fushatave:
“Gjithmonë e rrit presionin ndaj serbëve, gjithmonë është më i ashpër ndaj tyre, sepse kështu tenton të mbledhë votat e shqiptarëve në një shoqëri thellësisht të radikalizuar nacionaliste që ai vetë e ka krijuar. Ai e di mirë se aty mbledh vota, e jo me rezultate ekonomike, sepse nuk ka. As me luftën kundër krimit dhe korrupsionit.”
I njëjti bashkëbisedues shpjegon edhe arsyen e datës 28 dhjetor:
“Rreth festave të rëndësishme, Kurti llogarit që një numër i madh i shqiptarëve të shpërngulur do të kthehen për pushimet e Krishtlindjeve në Evropën Perëndimore. Llogarit edhe në më të rinjtë ndër ta, prej të cilëve mbështetet Vetëvendosja. Prandaj kjo datë mund t’i sjellë më shumë vota.”
Mashtrim
Teksti mban titullin:
“KURTI Rrit presionin ndaj serbëve: Para përsëritjes së zgjedhjeve më 28 dhjetor në Kosovë, Prishtina po përgatit manipulime dhe provokime të reja”
Titulli sugjeron se redaksia ka prova që Kurti “po përgatit provokime” dhe se presionet tashmë po ndodhin.
Por një pretendim i tillë nuk gjendet askund në tekst si fakt, por vetëm si opinion i bashkëbiseduesit, historianit Srđan Graovac.
Pretendimi për “provokime të reja” nuk mbështetet me asnjë dëshmi, dokument, qëndrim zyrtar apo ngjarje konkrete.
Fakti që bëhet fjalë për vlerësime dhe parashikime nuk theksohet në titull, duke e futur publikun në mashtrim.
Në gazetarinë profesionale, nëse titulli transmeton opinion të bashkëbiseduesit, kjo duhet të jetë qartë e shënuar: “Analisti pretendon se…”, “Bashkëbiseduesit paralajmërojnë mundësinë e…”, etj.
Në këtë rast titulli është formuluar që të tingëllojë si informacion i verifikuar editorial, megjithëse, sipas të gjitha gjasave, nuk është.
Problemi i shumëfishuar
Teksti është problematik edhe për shkak të tonit sensacionalist. Fraza si “e shtrëngon rrethimin në maksimum”, “dhuna e Prishtinës”, “inxhinieri e vrazhdë zgjedhore”, “e instaloi Rashiqin” krijojnë atmosferë frike te lexuesi.
Për më tepër, tekstin me të njëjtin titull e kanë transmetuar edhe tabloidet e tjera të mëdha beogradase – Alo, Informer, si dhe portali Srbija info.
Me apo pa qëllim, pa analizuar faktet, ata vetëm e kanë amplifikuar narrativën manipuluese.
Problemi, pra, është shumëfishuar.
Preuzimanje i objavljivanje tekstova sa portala KoSSev nije dozvoljeno bez navođenja izvora. Hvala na poštovanju etike novinarske profesije.
