“Serbia po i shkel obligimet e saj nga procesi i normalizimit të marrëdhënieve me Kosovën dhe marrëveshjet nga dialogu duke u kundërshtuar anëtarësimit të Kosovës në Interpol”, është thënë nga BE-ja për medien e Prishtinës Koha, pasi që shefi i MPB-së së Serbisë, Ivica Daçiq, deklaroi se nuk ekziston mundësia që Kosova të jetë anëtare e kësaj organizate. Për këto pohime ka reaguar edhe drejtori i Zyrës për KiM, Petar Petkoviq.
Zëvendëskryeministri i Serbisë dhe ministri i punëve të brendshme, Ivica Daçiq, është dekoruar me Medaljen e Rangut të Posaçëm, çmimin më të lartë që Interpoli ua ndan ministrave të punëve të brendshme për kontribut të jashtëzakonshëm në fushën e bashkëpunimit të sigurisë.
Daçiqit ky çmim i është dorëzuar në Marakeş, në Marok, ku ai udhëtoi të hënën, në hapjen solemne të punimeve të Asamblesë së 93-të të Përgjithshme të Interpolit.
Pikërisht aty ai është dekoruar me Medaljen e Rangut të Posaçëm, çmimin më të lartë të Interpolit për kontribut të veçantë në bashkëpunimin e sigurisë, ka njoftuar MPB-ja e Serbisë.
Daçiq u mburr në rrjetet sociale me këtë çmim duke thënë se për të paraqet “nder të veçantë”.
“Nuk ekziston mundësia që Kosova të jetë anëtare e Interpolit”
Megjithatë, të hënën, në hapjen solemne të Asamblesë së 93-të të Përgjithshme të Interpolit, Daçiq deklaroi se “në rend dite nuk ka pasur kërkesë të Kosovës për pranim në anëtarësim”.
Ai vlerësoi se kjo është “një mesazh i qartë se Prishtina e di që nuk e ka shumicën dhe se nuk ekziston kurrfarë mundësie të pranohet në këtë organizatë ndërkombëtare”.
“Herën e fundit ata kanë aplikuar në Dubai para disa vitesh, dhe pas një disfate katastrofale, tash e disa vite nuk aplikojnë për anëtarësim në Interpol”, tha ai.
(Koha) – BE-ja: Serbia po i shkel obligimet
Lidhur me deklaratat e Daçiqit, ka reaguar edhe Bashkimi Evropian.
Në përgjigjen për Kohën, BE-ja ka theksuar se, sipas tyre, “Serbia po i shkel obligimet nga procesi i normalizimit të marrëdhënieve me Kosovën dhe nga marrëveshjet e dialogut duke kundërshtuar anëtarësimin e Kosovës në Interpol”, ka transmetuar ky medium.
Petkoviq: Mjafton për të mençurin
Për reagimin e BE-së është deklaruar edhe drejtori i Zyrës për KiM, Petar Petkoviq.
Sipas tij, Beogradi “nuk po shkel asnjë obligim”, sepse, siç tha ai, është i vetmi në dialog i përkushtuar normalizimit dhe marrëveshjeve të arritura.
“Prishtina po refuzon që 13 vjet ta zbatojë Marrëveshjen e Brukselit dhe të formojë ZSO-në, ndërsa me terrorin ndaj serbëve çdo ditë po e shkel dialogun. As Kurti as zëdhënësi i BE-së nuk duan të flasin për këtë. Mjafton për të mençurin!”
KE: “Serbia vazhdoi të lobojë kundër anëtarësimit të Kosovës në organizata ndërkombëtare”
Ndryshe, në raportin e fundit të Komisionit Evropian për Kosovën, në fillim të këtij muaji, është shënuar se Serbia, siç u tha, “ka vazhduar të lobojë kundër anëtarësimit të Kosovës në organizata ndërkombëtare”, pavarësisht obligimeve të marra në kuadër të dialogut.
Sipas marrëveshjes së ratifikuar ligjërisht detyruese, Serbia është e obliguar që “të mos e pengojë anëtarësimin e Kosovës në organizata ndërkombëtare dhe rajonale”.
Preuzimanje i objavljivanje tekstova sa portala KoSSev nije dozvoljeno bez navođenja izvora. Hvala na poštovanju etike novinarske profesije.
